Kontenierët me mbetje të rrezikshme të nisur prej portit të Durrësit me destinacion Kinën dhe Tajlandën dhe investigimi i mediave të huaja, hodhi dritë mbi pazarin që kompania “Kurum” kishte bërë me kompaninë “Sokolaj”.
Prokuroria e Durrësit nisi një hetim për kompaninë “Kurum”, ndërkohë që kjo e fundit si formë presioni njoftoi largimin nga puna të rreth 500 punëtorëve.
Ditën e sotme një grup ekipesh të Krimit Ekonomik të Durresit kanë mbërritur pranë kompanisë turke Kurum në Elbasan për të hetuar mbi skandalin e eksporteve të mbetjeve te rrezikshme. Pritet që në Kurum të mbërrijne edhe prokurorët e Durrësit të cilët po ndjekin këtë çështje. Ata do të njihen me dokumentacionin dhe arkivat e kompanisë e cila operon në Elbasan që prej vitit 1998.
Nderkohe Inspektorati Shtetëror i Punës dhe Shërbimeve Shoqërore po monitorojnë zhvillimet në Kompaninë turke “Kurum International” e cila jo zyrtarisht deklaroi para pak ditësh se puna në Uzinën e Çelikut është ndërprerë prej më shumë se 1 jave.
Shkak i ndërprerjes sipas kompanisë është bërë rritja e kostos së prodhimit të çelikut, duke bërë që kjo kompani të mos jetë konkurruese me tregun e Kinës dhe Turqisë. Kompania turke pretendon se janë lajmëruar punonjësit dhe se është bërë marrëveshja e sindikatën e punonjësve për ndërprerjen e punës.
Me mbylljen e aktivitetit rezulton se të paktën 500 punonjës mbeten pa punë. Prokuroria e Durrësit ka nisur hetimet, dhe i gjithë aparati shtetëror po hetojnë çështjen pasi kompania bëri lëvizjen e papritur duke mbyllur dyert për 500 punëtorë dhe duke pezulluar aktivitetin prodhues.
Aktualisht në këtë kompani vijon punën vetëm sektori i shitjes. Të mbyllura janë Uzina e Çelikut dhe Petëzimit. Punëtorëve ju është premtuar vijimi i pagesës deri në Tetor 2024.