Kreu i një bande droge në Amerikën Latine tentoi të arratisej nga një burg në Paraguaj.
César Ortíz, i cili njihet edhe si “Gordito Lindo”, kishte një vizitë në burg nga një grua, e cila e shoqëroi në një dhomë private. Dhe në një moment gjatë vizitës, ai ndërroi rrobat, duke u veshur si grua, shtoi qerpikë fals, aplikoi grim në fytyrën e tij dhe vendosi një paruke.
Autoritetet thanë se 36-vjeçari nuk u zbulua teksa ecte nëpër disa pika kontrolli përpara se një roje të hapte portën e daljes nga burgu.
Ndërkohë, policët vunë re Ortíz-in disa blloqe larg burgut, ndërsa arrestuan edhe tre persona të tjerë, të cilët dyshohet se ishin pjesë e komplotit, teksa ishin gati ta largonin në një strehë në rajonin qendror të Paraguait.
