Një operacion ndërkombëtar kundër trafikut të drogës ka çuar në pranga 22 shqiptar. ‘Hani kënaquni’ është emri i operacionit që çoi në arrestime në të gjithë Italinë.
Bandës italo-shqiptare iu zbuluan rreth 800 kilogramë heroinë dhe kokainë gjatë tre viteve. Nëse do të dilte në treg, droga do të kapte një vlerë mbi 8 milion euro.
Mediat italiane thonë se hetimet për operacionin “Eat enjoy” nisën në janar 2018, pas deklaratave të një korrieri me origjinë nga Campania, i martuar me një shqiptare, edhe ajo në arrest shtëpie, të dy banues në Trieste.
Ai tha se kishte trafikuar në Itali rreth 800 kilogramë kokainë dhe heroinë, në këmbim të shumave të konsiderueshme të parave të transferuara në Holandë, të ardhura sigurisht nga trafiku i drogës.
Hetimi nisi dy vjet më parë dhe rezultoi sot në ndalimin e 26 personave, 22 shqiptarë, ku 13 prej tyre janë në burg e të tjerët në arrest shtëpie.
Droga në Italinë veriore importohej nga Roterdami i Holandës, ku një grup shqiptarësh kryenin rolin e furnitorëve dhe e dërgonin në Itali me makina.