Një gropë e madhe është hapur në mes të rrugës në qytetin e Beratit, e bëhet fjalë për segmentin Polici- Stadiumi “Tomorri” ndërtimi i të cilës përfundoi 3 vite më parë.
Një automjet që ishte duke ecur përgjatë këtij aksi ka rënë në gropën e shembur në rrugë. Ai ka pësuar vetëm dëme materiale por fatmirësisht nuk ka pasur të lënduar në njerëz.
Menjëherë në vendngjarje kanë shkuar specialistë të Drejtorisë së Shërbimeve Publike në bashkinë e Beratit, të cilët kanë rrethuar vendin dhe kanë pezulluar qarkullimin e mjeteve pranë rrugës së shembur.
Burime zyrtare pranë kësaj drejtorie deklarojnë se do të punohet gjatë gjithë natës për riparimin e rrugës së shembur, që mendohet të përfundojë nesër në mesditë.
Specialistët e kësaj drejtorie bëjnë me dije se rruga ka shkarë dhe më pas është shembur për shkak të shembjes së njërit krah të murit mbajtës nëntokësor të kanalizimeve të ujërave të zeza.