Sipas Edi Ramës, rilindja e industrisë ushtarake do të krijojë shumë vende pune të mirëpaguara në Gramsh. Në një takim me socialistë të Gramshit, Rama u ndal te rivitalizimi i industrisë ushtarake, të cilën e cilësoi një hap tjetër shumë të rëndësishëm në rrugën drejt Shqipërisë 2030. Rama theksoi se në Gramsh ka një histori, traditë dhe mundësi, ndaj i siguroi banorët se do të vazhdojë puna që ka nisur në këtë drejtim.
”Po diskutojmë me kompani të ndryshme për disa pika të Shqipërisë. Një nga pikat ku duam të sjellim një kompani të madhe për të filluar prodhimin dhe punësuar me paga shumë të mira do ta bëjmë reale më herët sesa vonë këtu në Gramsh”, tha Rama.
Kryeministri shtoi se Gramshi është një bashki me shumë potencial por me pak mundësi nga pikëpamja e buxhetit të vetë bashkisë. ”Ne po e shohim se si Gramshi ka filluar të vizitohet, pra ajo ‘perdja e hekurt’ që kishte rënë midis Gramshit dhe pjesës tjetër të Shqipërisë ra me rrugën e re, u bë lidhja e shpejtë dhe ndërkohë për shumë njerëz që nuk e kishin marrë ndonjëherë rrugën deri këtu, bukuritë e gjithë zonës kanë filluar të zbulohen”, tha Rama.
Kryeministri theksoi se qeveria po nxit mbështetjen dhe po synon t’i japë krahë çdokujt që do të investojë në këto territore kaq të bukura për të hapur dyer të tjera mikpritjeje. Po ashtu, premtoi edhe përmbylljen e disa segmenteve të tjera rrugore që do të nxisin më tej turizmin, agroturizmin dhe ekonominë përmes vënies në dispozicion të gjithë bukurive të jashtëzakonshme që ka Gramshi.