Kryetarja e bashkisë së Durrësit, njëherësh kandidate e Partisë Socialiste, Emiriana Sako thotë se Igli Cara ka gabuar rëndë që u ka dhënë dy individëve më problematikë në Shqipëri, fytyrën dhe emrin e tij, por Durrësi nuk ka më asnjë shans për t’i dhënë padronëve të Carës.
Përmes një postimi në Facebook, lidhur me përballjen me kandidatin e “Bashkë Fitojmë”, Igli Cara për zgjedhjet e 14 majit për bashkinë e Durrësit, Sako thekson se “në 14 maj Igli do të kthehet tek mama në pritje për padronin e radhës, ndërsa unë do vazhdoj punën me Edi Ramën dhe Partinë Socialiste. Bashkia e Durrësit është e durrsakëve që duan të shkojnë vetë përpara dhe kurrë s’do të jetë më e nongratave dhe e kukullave si puna jote, që me Durrësin i lidhin vetëm hallet dhe interesat personale”, tha Sako.
Sako u shpreh se nuk është politikane dhe nuk e ka kuptuar asnjëherë politikën si përballje personash. “Për mua politika është ballafaqim vizionesh, programesh, rezultatesh. Por, duke qenë se Igli Cara merret më shumë me mua, sesa me mamën e tij siç e thotë edhe vetë, dua t’ju them dy fjalë. Igli Carën unë nuk e njoh, emrin e tij e kam dëgjuar dikur si njeri që shiste vende pune kur PD-ja ishte në pushtet”, u shpreh Sako.
Ky reagim i saj vjen pasi Cara gjatë fushatës së tij ka artikuluar se Sako është një vegël e Vangjush Dakos, i cili ndonëse ka dhënë dorëheqjen, sipas tij, nuk ka ikur kurrë nga drejtimi i qytetit.