Këtë të premte, drejtori i krimit ekonomik në Tiranë u pa të futet në banesën e Sali Berishës për të kontrolluar nëse ai po zbaton masën e sigurisë caktuar nga GjKKO një ditë para vitit të ri, ajo e ”arrest shtëpie” me mbikëqyrje policore.
Erion Ismaili, Drejtor i Krimit Ekonomik në Tiranë ka hyrë në banesën e ish-kryeministrit që ndodhet në rrugën “Mustafa Metohiti’ në Tiranë. Ish-kryeministri është nën hetim për korrupsion pasiv në lidhje me privatizimin e ish-kompleksit sportiv “Partizani”.
SPAK ua ka lënë detyrë policëve që të trokasin në derën e Berishës dhe verifikojnë nëse është aty apo jo. Nuk ka asnjë orar se kur kryhet kontrolli, ndërkohë që për çdo kontroll, oficeri shënon nëse Berisha është në banesë.