Është djegur i gjallë një mjek që punonte në një projekt të financuar nga Mbretëria e Bashkuar në Guatemalë. Ngjarja e rëndë ndodhi për shkak se banorët akuzonin për praktikim të magjisë.
Një video prej disa sekondave tregon Domingo Choc Che 56 vjeç duke kaluar nëpër një fushë ndërsa flakët kanë përfshirë trupin e tij, të cilat i shkaktuan vdekjen.
Ngjarja e rëndë ndodhi më 6 qershor në qytetin Chimay. Specialisti i mjekësisë dhe shëruesi tradicional po punonte si bashkëpunëtor në një projekt farmaceutik të University College London (UCL).
Ekipi raportohej se po shikonte ilaçet tradicionale me bazë bimore dhe po punonte me udhëzues lokalë. Por, siç thuhet më tej, një turmë e zemëruar i është drejtuar studiuesit, duke akuzuar për praktikimin e magjisë.
Ata e fajësuan atë që shkaktoi vdekjen e një anëtari të komunitetit, pasi i dha disa ilaçe. Në video shihet se mjeku është i rrethuar nga njerëz të tjerë, por asnjë prej tyre nuk e ndihmon. Guvernatori i Peten, Luis Burgos, tha për mediat lokale se fshatarët kishin bllokuar oficerët e policisë që të futeshin në këtë zonë.