Redon Xhixha fiton Topin e Artë 2022 të futbollit shqiptar. Ish-sulmuesi i Tiranës, i transferuar pak ditë më parë te Qarabag në Azerbajxhan, fitoi garën me Xhuliano Skukën dhe Mentor Mazrekajn.
Në mungesë të bomberit, trofeun e tërhoqi ish shoku i tij i skuadrës te Tirana, Marsel Ismajlgeci, i cili u shpreh:
“Meqë Redoni nuk është këtu më tha t’ju them disa fjalë. Iu falënderon që e keni zgjedhur dhe falënderon gjithashtu dhe çunat e ekipit që e kanë ndihmuar të fitojë këtë çmim. Ne i urojmë suksese në karrierën e re, shpresoj që në të ardhmen të ikim edhe ne jashtë siç iku ai”.
Përmes një video-mesazhi, Redon Xhixha u shpreh i emocionuar që është vlerësuar me këtë çmim, ndërsa e cilësoi futbollin shqiptar si një vitrinë për të bërë hapa të rëndësishëm në karrierë.
‘Është një emocion jashtëzakonisht i madh për mua që jam vlerësuar me këtë çmim. Ndihem keq që nuk jam sonte në sallë me ju që ta tërheq vetë këtë çmim, por para pak ditësh finalizova transferimin tim te Qarabag dhe e kam të pamundur të jem aty. Dua të falënderoj familjen time dhe ekipin e Tiranës ku dola kampion. Dua të them që futbolli shqiptar është një vitrinë e mirë për të bërë një hap të rëndësishëm në karrierë në ekipet e njohura europiane. Mbrëmje të bukur të gjithëve dhe ia kalofshi sa më mirë”.
Ndërkohë, përsa i përket kategorisë së femrave, Topi i Artë 2022 shkon për sulmuesen e Vllaznisë dhe të Kombëtares Shqiptare, Megi Doçi.
Një çmim i veçantë në mbrëmjen gala të FSHF-së “Më të Mirët 2022” ka shkuar pikërisht për Vllazninë e vajzave me motivacionin “si promotore e jashtëzakonshme në rritjen e cilësisë sportive në futbollin e femrave në Shqipëri dhe për arritjen në fazën e grupeve në UEFA Ëomen Champions League 2022-2023, rezultat i paimagjinuar më parë”. Drejtuesve të Vllaznisë iu dorëzua çmimi “Pllakatë” e FSHF-së.