Në Qendrën Spitalore Universitare “Nënë Tereza” është vënë në në funksion të plotë akseleratori i 3-të linear në shërbimin Onkologjik, ku tashmë ka nisur edhe trajtimi i pacientëve të parë.
Sipas minisitres së Shëndetësisë, Evis Sala ky investim rrit jo vetëm kapacitetin e trajtimit të pacientëve duke e çuar në 200 pacientë në ditë por edhe cilësinë.
“Përmirëson ndjeshëm cilësinë e shërbimit për pacientët onkologjikë, përmes aplikimit të teknologjive moderne dhe teknikave me precizion të lartë”, tha Ministrja e Shëndetësisë, Evis Sala.
Nga ana tjetër ministrja tha se vijon puna për të sjellë brankiterapinë dhe akseleratorin e 4-t linear.
Sëmundjet tumorale janë sëmundjet më të përhapura në vend pas hipertensionit dhe sëmundjeve të zemrës.
Gjatë një viti në vendin tonë diagnostikohen mbi 7 mijë raste të reja me kancer, ku një ndër më të përhapurit janë tumoret e gjirit.