Në Kashar po vijon puna për ndërtimin e stadiumit provizor që do të presë koncertin e Kanye West më 11 korrik në Tiranë.
Ministri i Turizmit, Kulturës dhe Sportit, Blendi Gonxhja, përmes një postimi në rrjetet sociale, ka deklaruar se “Eagle Stadium” po transformohet dita-ditës për të akomoduar rreth 60,000 spektatorë.
Sipas tij, tribunat kanë mbërritur tashmë dhe ndërtimi i stadiumit po vijon me ritme intensive.
Spektakli i Kanye West konsiderohet si një nga ngjarjet më të mëdha muzikore të organizuara ndonjëherë në Shqipëri.
Çmimet e biletave nisin nga 120 euro, ndërsa për vendet VIP arrijnë deri në 339 euro. Koncerti është pjesë e turit botëror të artistit për vitin 2026, i cili nis në SHBA dhe vijon më pas në Azi dhe Europë.
Eventi organizohet nga “Streetlife”, një kompani me bazë në Berlin, e cila ka bashkëpunuar me artistë si 50 Cent, Drake, Snoop Dogg, Kendrick Lamar dhe Nicki Minaj, ndërsa në Shqipëri mbështetet nga Redcloud (Tiranë) dhe Live Label (Hollandë).
Postimi i plotë
Edhe 15 ditë! Kanye West in Albania
Numërimi mbrapsht ka nisur dhe Eagle Stadium po transformohet dita-ditës për të mirëpritur rreth 60,000 spektatorë në spektaklin më të madh muzikor që ka parë ndonjëherë Shqipëria.
Kamionët e parë me tribunat kanë mbërritur dhe ndërtimi i stadiumit po avancon me ritme intensive. Çdo ditë na afron më pranë një nate historike.
Më 11 Korrik 2026, Tirana bëhet epiqendra europiane e muzikës, showbiz-it dhe kulturës me një super-produksion monumental, skenë gjigande, teknologji immersive dhe një eksperiencë që shkon përtej çdo koncerti të organizuar më parë në Shqipëri.
Eagle Stadium, Kashar – Tiranë
11 Korrik 2026