Ka rinisur operacioni për gjetjen e 30-vjeçarit Jurgen Karaj, i cili dyshohet se është zhdukur pranë Urës së “Halilit”, në rrugën e fshatit Fullqet, në orët e para të mëngjesit të së shtunës, pas një aksidenti rrugor.
Ngjarja ka ndodhur rreth orës 01:30, kur automjeti tip Audi, me targa angleze, që drejtohej nga 24-vjeçari Andi Losha, ka dalë nga rruga dhe ka përfunduar në zallin e Darsit. Dyshohet se Jurgen Karaj ndodhej si pasagjer në mjet.
Në operacionin e kërkimit janë angazhuar rreth 300 persona, përfshirë: 20 forca të Forcave të Armatosura me 4 mjete, 6 forca operacionale, 4 efektivë të Policisë Ushtarake, rreth 100 forca bashkiake, 150 vullnetarë nga Bashkia Klos, MZSH e Bashkisë Mat, si dhe banorë të zonës.
Kërkimet janë përqendruar nga grykëderdhja e lumit Mat në liqenin e Ulzës, përgjatë shtratit të lumit në drejtim të Klosit.
Drejtuesi i mjetit, Andi Losha, ka arritur të dalë i gjallë nga uji, ndërsa ende nuk dihet fati i 30-vjeçarit. Ai ndodhet aktualisht i arrestuar, nën akuzat për largim nga vendi i ngjarjes, mosdhënie ndihme ndaj pasagjerit dhe drejtim mjeti në gjendje të dehur.
Operacioni i kërkimit vijon.
