Polakë, ukrainas, suedezë dhe italianë kanë vënë nën shënjestër pasuritë e paluajtshme në bregdetin shqiptar. Megjithatë Xheni Jahja nga Tirana Real Estate thotë se të huajt po stepen të blejnë, për shkak të disa prej ngjarjeve politike.
I këtij mendimi është edhe Eron Çumani nga Saranda Invest Property. Blerësit e huaj ndikohen ndjeshëm nga situata politike për rezervimet. Z. Çunami parashikon se do të penalizohen nga politika në numrin e transaksioneve.
Në krahasim me 2018-n, për Jonian Antonin nga Century 21, kërkesa ka qenë pothuajse e njëjtë për të huajt. Ai shpjegon se për të huajt, zona ku blejnë nuk ka rëndësi. Peshë ka distanca jo më shumë se një orë larg nga aeroporti, infrastruktura e mirë rrugore, por edhe infrastruktura e shërbimeve.
Ilir Konomi thotë se vijojnë të punojnë me klientë të huaj. Më të interesuarit janë polakët, që zënë kërkesën kryesore, edhe pse në numra mbeten modestë, dhe suedezët. Konomi shpjegon se është në rritje kërkesa nga të huajt për Vlorën. Zona ka reflektuar njëkohësisht edhe rritje në çmime të pronave, ndonjëherë edhe artificiale.
Duke qenë se kërkesa ka qenë në rritje dhe oferta në vendnumëro, kjo ka sjellë rritje të çmimeve, shpjegon Çumani. Për Sarandën, ai shprehet se klientela e preferuar vijojnë të mbeten polakët. Në vijën e parë të detit pronat fillojnë nga 1300 euro/m². Çmimet e pronave në këtë qytet janë rritur me të paktën 10% – pohon Konomi.
“Italianët vijnë shumë, por kërkojnë shumë lirë, janë klientë të vështirë, ndërsa polakët mirë në numra, kanë edhe emigracion shumë të cilët jetojnë jashtë dhe kanë para për të blerë”,- shtoi ai. Për Durrësin, ai shprehet se ka kërkesë, por me të huajt punojnë kryesisht me Gjirin e Lalëzit, në komplekset dhe fshatrat turistikë që kanë standard në ndërtim dhe shërbime. Në fshatrat turistikë, çmimet variojnë 800 deri në 900 euro/m² për apartamentet, ndërsa vilat 1000-1100 euro/m².
Vilat në bregdet po tërheqin të huajt
Kompani që po zhvillojnë projektet në bregdet vlerësojnë se kërkesa për të blerë mbetet e lartë. Ka një lloj diversifikimi të blerësve, të cilët nuk janë më tipikisht shqiptarët e diasporës. Sigurisht, ata vijojnë të mbeten pjesa e rëndësishme e blerësve por sot, për herë të parë në Shqipëri, po kërkojnë të blejnë nordikët, izraelitët, rusët, ukrainasit. E gjitha kjo është e lidhur me tendencën që ka pasur edhe turizmi. Ka pasur të zhgënjyer që nuk duan të kthehen më në Shqipëri, nga ata që thjesht duan të mbeten turistë, ndërkohë që ka edhe nga ata që duan të kenë një pasuri të paluajtshme për t’u rikthyer si turistë apo banorë të përhershëm.
Ledia Telhai, nga “Balfin Real Estate”, konfirmon se të paktën në dy projekte të rëndësishme të kompanisë, blerësit janë shqiptarë dhe të huaj nga vende të ndryshme të Europës, por jo vetëm. Konkretisht në “Green Coast”, interes kanë shprehur blerës nga Zvicra, Austria, Italia, por edhe nga vende më larg si: Izraeli, Rusia, Shtetet e Bashkuara apo Anglia. Gjithsesi, deri më tani, 60% e blerësve janë shtetas shqiptarë. Në “Vala Mar Residences”, në Hamallaj, rreth 75% janë shtetas shqiptarë dhe pjesa tjetër është nga diaspora, shtetas të Kosovës, si dhe vendet nordike.
Të njëjtën tendencë konfirmon edhe kompania “Concord Investment”, e cila po zbaton një seri projektesh përgjatë bregdetit, duke nisur nga “San Pietro Resort” tek “Palasa Resort” dhe së fundmi edhe “Kep Merli”. Kompanitë nënvizojnë se grupi i atyre që po blejnë vilat në bregdet varion, por nuk mungojnë moshat e thyera, të cilat kanë edhe mjetet e nevojshme financiare për të investuar në një pasuri të kësaj natyre. Nuk janë të pakta rastet kur pensionistë të huaj kanë zgjedhur të jetojnë në Shqipëri prej kostos së ulët të jetesës në raport me vendet e tyre dhe duket se një grup i vogël do të jenë edhe banorë të këtyre fshatrave turistikë./ Monitor