Virusi i Nilit Perëndimor po përhapet me ritme shqetësuese në Greqi, duke rritur shqetësimin e autoriteteve shëndetësore për përhapjen e mëtejshme të infeksionit.
Gjatë javës së fundit është shënuar rritje e ndjeshme e rasteve të konfirmuara, ndërsa numri i viktimave ka arritur në gjashtë. Të gjithë personat që kanë humbur jetën ishin mbi moshën 65 vjeç.
Nga të prekurit, 54 pacientë kanë shfaqur komplikacione në sistemin nervor qendror, përfshirë encefalitin, meningjitin dhe paralizën akute. Aktualisht, 20 persona vijojnë të marrin trajtim në spitale, ndërsa tetë prej tyre ndodhen në terapi intensive.
Vatrat kryesore të infeksionit janë identifikuar në rajonin e Atikës, ku përfshihet edhe zona e Athinës, si dhe në Thesali dhe Maqedoninë Qendrore. Autoritetet shëndetësore raportojnë qarkullim veçanërisht të lartë të virusit në Atikë, ndërsa disa zona të tjera janë klasifikuar si me rrezik të shtuar, edhe pse deri tani nuk janë regjistruar raste te njerëzit.
Virusi i Nilit Perëndimor transmetohet kryesisht përmes pickimit të mushkonjave të infektuara. Mushkonjat e marrin virusin nga shpendët dhe nuk ka transmetim të drejtpërdrejtë nga një person te tjetri përmes kontaktit të zakonshëm.
Rreth 80 për qind e personave të infektuar nuk shfaqin simptoma. Shumica e rasteve të tjera kalojnë me shenja të lehta, të ngjashme me gripin, ndërsa më pak se 1 për qind zhvillojnë komplikacione të rënda neurologjike.
Grupet më të rrezikuara janë të moshuarit, personat me sëmundje kronike dhe individët me sistem imunitar të dobësuar.
Autoritetet greke kanë paralajmëruar se sezoni i transmetimit të virusit vijon dhe se raste të reja mund të shfaqen edhe në zona të tjera të vendit.