Superliga shqiptare e futbollit vijon këtë të shtunë me ditën e dytë të javës së 20-të. Gjithçka nisi në Rrogozhinë, aty ku Erzeni humbi 0-1 nga Vllaznia vetëm në momentet e fundit, falë edhe një gafe të portierit shijakas. Në 17:00 luhet Partizani – Laçi, ndërsa sfida tjetër mes Skënderbeut dhe Dinamos u shty për shkak të reshjeve të shumta të dëborës në Korçë.
Në fushën neutrale të Rrogozhinës, Erzeni humbi “në shtëpi” 0-1 nga Vllaznia. Një gol në fundin e duelit nga Stojanovic i dha tri pikë shkodranëve, për fitoren e pestë radhazi nën drejtimin e Qatip Osmanit. Loja ishte me raste për dy skuadrat, teksa gjithçka u vendos vetëm në fundin e saj. Duhej një krosim nga këndi i Malës që Bruno Puja mos e kontrollonte dot topin dhe sfera e mbetur në zonë u shty nga mbrojtësi Stojanovic drejt rrjetës.
Gjatë festës së golit, drejtori sportiv i Vllaznisë, Tefik Osmani u godit me shishe në fytyrë nga tribuna, duke u rrëzuar në tokë dhe marrë ndihmën mjekësore. Nuk munguan tensionet mes tifozëve dhe pankinës shkodrane, ndërsa gjithçka u mbyll me kaq. Vllaznia me 32 pikë shkon në vendin e tretë, ndërsa Erzeni me 22 pikë mbetet në vendin e tretë nga fundi.