Deputetja demokrate, Albana Vokshi ka kërkuar dorëheqjen e ministres së Arsimit, Evis Kushi.
Në një deklaratë për mediat, ajo bëri me dije se ditën e sotme mori pjesë në seancën gjyqësore për një padi të bërë ndaj Kushit, për tezat e provimit të maturantëve që dolën para provimeve.
Pas përfundimit të seancës, Vokshi tha se Kushi nuk ishte e pranishme për t’u përballur me provat.
“Sot isha në seancë gjyqësore për një padi të ministres Kushi, për denoncimin që kam bërë për nxjerrjen e tezave. ishte seanca e parë që quhet seanca pajtuese, por ministrja Kushi nuk ndodhej. E pata të pamundur për të paraqitur provat, pasi ministrja Kushi nuk ishte. Ministrja, sa kohë harxhon nëpër gjyqe duke bërë të pafajshmen, do ishte mirë nëse i ka mbetur një fije morali të jepte dorëheqjen”, deklaroi deputetja.