Grupi gjerman Volkswagen ka prezantuar një plan të thellë ristrukturimi që parashikon reduktimin deri në 50% të modeleve të automjeteve dhe uljen e kapacitetit global të prodhimit, në përpjekje për të përballuar rritjen e kostove dhe konkurrencën gjithnjë e më të fortë të prodhuesve kinezë të automjeteve elektrike.
Strategjia u prezantua pas mbledhjes së bordit mbikëqyrës të kompanisë dhe shënon një nga transformimet më të mëdha në historinë e prodhuesit më të madh evropian të automobilëve.
Sipas planit, Volkswagen synon të fokusohet vetëm në segmentet më fitimprurëse të tregut, ndërsa do të reduktojë ndjeshëm kompleksitetin e gamës së produkteve dhe numrin e varianteve të disponueshme për secilin model. Kompania synon gjithashtu të ulë kapacitetin e prodhimit në rreth 9 milionë automjete në vit, nga rreth 12 milionë që kishte përpara pandemisë.
Megjithëse kompania nuk ka bërë publike se cilat modele do të hiqen nga prodhimi dhe as nuk ka konfirmuar mbylljen e fabrikave apo shkurtimet e vendeve të punës, raportime të mediave gjermane dhe Reuters flasin për një plan që mund të prekë deri në 100 mijë vende pune deri në fund të dekadës, si dhe mundësinë e mbylljes së katër impianteve në Gjermani. Megjithatë, këto masa nuk janë miratuar zyrtarisht nga bordi.
Drejtori ekzekutiv Oliver Blume deklaroi se industria automobilistike po përballet me një realitet krejtësisht të ri.
“Situata globale është përkeqësuar ndjeshëm gjatë 12 muajve të fundit”, tha ai, duke përmendur tensionet gjeopolitike, tarifat tregtare, rritjen e kostove, rregulloret më të ashpra dhe konkurrencën në rritje si faktorët kryesorë që po ushtrojnë presion mbi kompaninë.
Volkswagen kontrollon një nga grupet më të mëdha automobilistike në botë, me marka si Audi, Porsche, Škoda, SEAT, Cupra, Bentley, Lamborghini, Ducati dhe prodhuesin e mjeteve të rënda Traton, ku bëjnë pjesë MAN, Scania dhe International.
Një nga sfidat kryesore të grupit është mbivendosja e modeleve dhe teknologjive mes markave të tij, çka ka rritur kostot e zhvillimit dhe prodhimit. Përmes planit të ri, kompania synon të reduktojë edhe numrin e konfigurimeve dhe opsioneve të automjeteve deri në 75%, për të thjeshtuar proceset dhe për të rritur fitueshmërinë.
Kriza e Volkswagen lidhet ngushtë me humbjen e terrenit në tregun kinez, ku prodhues si BYD, Geely dhe kompani të tjera vendase po fitojnë gjithnjë e më shumë pjesë tregu falë automjeteve elektrike me teknologji të avancuar dhe çmime më konkurruese. Rënia e kërkesës në Kinë, së bashku me tarifat amerikane për automjetet e importuara dhe kostot e larta të prodhimit në Evropë, kanë ushtruar presion të madh mbi rezultatet financiare të grupit.
Ekspertët e industrisë e konsiderojnë këtë ristrukturim si një moment vendimtar jo vetëm për Volkswagen, por edhe për të gjithë prodhuesit tradicionalë evropianë, të cilët po përpiqen të përshtaten me tranzicionin drejt elektromobilitetit dhe konkurrencën gjithnjë e më agresive nga Kina.
Burimi: Reuters