Joan Laporta pritet të kthehet përsëri në kreun e Barcelonës, pasi raportohet se ka fituar zgjedhjet e sotme për vendin e lënë bosh si president i klubit pas largimit me turp të Josep Maria Bartomeut. Sondazhet paraprake e nxjerrin atë fitues me një diferencë të thellë, ndërsa pak para mesnate do të bëhen të ditura shifrat zyrtare të këtyre votimeve.
Ajo që është e sigurt që tani është që Barcelona sot ka regjistruar një rekord sa i përket pjesëmarrjes në votime, edhe pse është periudhë pandemie. Deri në orën 20:00, një orë para se të mbyllej zyrtarisht votimi për president ku garonin tre kandidatë, pjesëmarrja ishte 50,48%, duke kaluar rekordin historik të anëtarëve të klubit që kishin votuar në vitin 2010.
Ndërkohë, TV3 në Spanjë ka bërë të gjithë projeksionet për fituesin nëpërmjet një sondazhi duke marrë për bazë 4 mijë votues dhe Laporta rezulton një fitues me diferencë të thellë. Presidenti që kthehet në detyrë pas thuajse një dekade, sipas këtij burimi do të sigurojë rreth 58,3% të votave, Viktor Font do të jetë në vendin e dytë me 31,3% dhe Toni Freiksa di të jetë i treti me 9,3% të preferencave të votuesve. Presidentët e kolegjit elektoral në klub, Rikardo Munjoz dhe Ksavier Gusieras do të publikojnë në orën 23:30 emrin e fituesit por për tifozët katalanas ka pak dyshime se ai do të jetë Laporta, i cili ndërtoi ciklin e suksesshëm nën drejtimin e Guardiolës dhe shpresojnë që të bëjë një gjë të tillë përsëri në vitet në vijim.