Lëvizja Vetëvendosje zhvilloi një mbledhje të përbashkët të Kryesisë me Grupin e saj Parlamentar, ku kanë diskutuar për zhvillimet e fundit politike në vend.

Në njoftimin e bërë për media thuhet se në mbledhje u kritikua ashpër Aktgjykimi i fundit i Gjykatës Kushtetuese për dekretin e presidentit, Hashim Thaçi për mandatarin Avdullah Hoti.

“U kritikua ashpër Aktgjykimi i fundit i Gjykatës Kushtetuese që e vulosi këtë Gjykatë si të kapur, madje edhe më fort se shteti ynë në përgjithësi. Përjashtimi edhe i zgjedhjeve edhe i fituesit është i pashembullt dhe e bën këtë Aktgjykim të padrejtë e të papranueshëm. U vlerësua mbështetja e madhe e qytetarëve, puna e mirë e Qeverisë në detyrë, dhe organizimi nga aktivistët i peticionit “Duam Zgjedhje!”. Duket qartë se ky peticion do t’i thyejë të gjitha rekordet duke u bërë peticioni më i madh në Kosovën e pasluftës”, thuhet në njoftim.

LVV thekson se po ashtu në mbledhje u kundërshtua tentimi për qeveri të re pa zgjedhje të reja nga regjimi i vjetër.

“Kjo qeveri do të ishte qeveri e presidentit. Ajo nuk do të merrte as 1/3 e mbështetjes qytetare elektorale dhe do të varej komplet nga Lista Serbe. Ndaj dhe negociatat brenda-qeveritare të saj do të bëheshin negociata ndër-shtetërore me Serbinë”.

LVV pohon se protestat po bëhen të pashmangshme. “Për ne, qeveria nuk është qëllim, por mjet për shtetin dhe shërbim për qytetarin. Natyrisht, nuk duam të dekurajojmë protesta të tjera të paralajmëruara nga grupe të ndryshme të qytetarëve”, thuhet në njoftimin e LVV-së.

Seanca për votimin e qeverisë së re pritet të mbahet nesër, në orën 11:00.

PËRGJIGJU

Please enter your comment!
Please enter your name here