Deputetja e PS-së Ermonela Felaj ka shpjeguar vendimin e grupit parlamentar socialist që injoroi Gjykatën Kushtetuese për çështjen “Xhaçka”. Për të Gjykata kushtetuese tentoi që t’i japë të njëjtën fuqi edhe pakicës. Po ashtu shton se Gjykata Kushtetuese ka fuqi interpretimi, por jo të bëjë ligj dhe në këto kushte vendimi më i drejtë është që merret mendimi i Komisionit të Venecias.
“Ka çaluar diçka që nuk jemi kuptuar drejt për çështjen Xhaçka. Dy qëndrimet e fundit të shprehur me votë në Kuvend i referohen një diskutimi që ne kemi mbajtur në këshillin e legjislacionit dhe diskutimi ka qenë tërësisht profesional dhe i lidhur me kushtetutën. Është çështje kushtetuese edhe duhet të kuptonin drejt se çfarë kanë dashur të thonë edhe gjyqtarët për çështjen Xhaçka. Pakica që vë në lëvizje Gjykatën Kushtetuese është 1/5, ndërkohë pakica 1/10 që është më e vogël se 1/5 nuk ka të njëjtën fuqi kushtetuese siç Kushtetua ia ka njohur kësaj pakice. Opozita e legjitimoi pyetjen e këtij eksperti dhe një nga konstatimet e ekspertit ishte që Gjykata Kushtetuese ka një lloj tejkalimi se pse Gjykata Kushtetuese ka tentuar t’i japë të njëjtën fuqi të vënies në lëvizje të saj edhe pakicës 1/10 duke e barazuar atë më 1/5? Ne na intereson që ta zgjidhim deri në fund këtë debat dhe ne kuptuam që ka një qëndrim aty brenda për të barazuar këto pakica”, tha Felaj në “A2cnn”.
Maxhoranca socialiste mbrojti më 13 shtator me votë kolegen Olta Xhaçka duke mos miratuar mocionin për dërgimin në Kushtetuese të kërkesës për papajtueshmëri mandati. 25 deputetë demokratë votuan pro, ndërsa 9 socialistë kundër. 65 të tjerë shtypen butonin e abstenimit duke bërë që projektvendimi të mos merrte votat e nevojshme për miratim. Kuvendi i Shqipërisë ka përgatitur një kërkesë Komisionit të Venecias për të marrë një opinion në lidhje me vendimin për të mos dërguar në Gjykatën Kushtetuese kërkesën për papajtueshmëri mandati të deputetes Olta Xhaçka.