Ka nisur marshimi këtë mbrëmje në Tiranë për vrasjen e Egli Progës, disa ditë më parë në Pogradec. Dhjetëra qytetarë janë mbledhur në sheshin ”Skënderbej” me pankarta në duar, për të protestuar për vrasjen e të riut.
Protestuesit mbajnë në duar foton e Egli Progës, por edhe pankarta të ndryshme si ”A fshihet e vërteta?”, “Kërkojmë drejtësi” etj. Në protestë është shpalosur dhe një banderolë e madhe ku shkruhet: Kundër gangove me pushtet.
Denis Meçe aktualisht ndodhet në burg, dhe vrasja e 42-vjeçarit shkaktoi përplasje institucionale mes policisë dhe prokurorisë. Ndërsa policia e referoi ngjarjen si vrasje me dashje, prokurorja e Korçës e zbuti akuzën në ”vrasje nga pakujdesia”.