Gjykata e Apelit ka lënë në fuqi vendimin e Shkallës së Parë për çështjen e vrasjes së Martin Canit, duke konfirmuar dënimin me 16 vite burg për Mario Përlleshajn.
Më 9 dhjetor 2025, Gjykata e Tiranës e shpalli Përlleshajn fajtor për veprat penale të vrasjes në rrethana të tjera cilësuese ndaj Martin Canit dhe vrasjes në rrethana të tjera cilësuese, të mbetur në tentativë, ndaj një tjetër të mituri që mbeti i plagosur gjatë ngjarjes.
Për vrasjen e Martin Canit, ai u dënua me 12 vite burg, ndërsa për tentativën e vrasjes së të miturit tjetër me 10 vite burg. Pas bashkimit të dënimeve, Gjykata caktoi dënimin përfundimtar me 16 vite burg, vendim që tashmë është lënë në fuqi edhe nga Apeli.
Ngjarja e rëndë ndodhi më 18 nëntor 2024, pas një konflikti mes të miturve që kishte nisur në shkollën “Fan Noli” në Tiranë dhe përfundoi me humbjen e jetës së Martin Canit dhe plagosjen e një tjetër të mituri.