Katër minorenët e arrestuar për vrasjen e 15-vjeçarit në Gramsh janë lënë në burg. Vendimi u mor sot nga Gjykata e Elbasanit.
Oligert Kume, avokati i një prej të miturve, Xhonatan Çekrezi, në një prononcim për mediat, u shpreh se fajtor për ngjarje të tilla është e gjithë shoqëria, ndërsa shtoi se duhet kuptuar gabimi i strukturave shtetërore.
“Falënderoj median për interesin e treguar. Sot u zhvillua seanca gjyqësore për masën e sigurisë për katër të miturit. Unë mbuloj Xhonatan Cekrezin, dhe jam i autorizuar nga prindërit e të miturit për të dhënë deklaratë. Solidarizohem jo vetëm si qytetar dhe avokat me dhimbjen e të miturit që nuk jeton më. I uroj shërim të shpejtë të plagosurit, në të njëjtën kohë nga ana juaj si media duhet të përcillni lajme me interes publik. Për mua, fajtor është e gjithë shoqëria. Do duhet të ndërgjegjësojmë komunitetin ku ne jetojmë. Duhet të kuptojmë se ku kanë gabuar strukturat shtetërore. E tërë shoqëria shqiptare është fajtore, çka do të thotë se media duhet të vijojë në përcjellën e lajmeve me interes publik. Për sigurinë e fëmijëve tanë. Doreza, thika shiten online”, u shpreh avokati Kume.