Kryeministri Edi Rama ka reaguar për ngjarjen e rëndë në Maliq, ku gjatë operacionit për kapjen e një personi në kërkim, u vra një efektiv i “Shqiponjave” dhe u plagos një tjetër.
Përmes një postimi në rrjetet sociale, Rama shprehu ngushëllime për vrasjen e efektivit Enea Mekolli duke e cilësuar si dëshmor të atdheut, si dhe i uroi shërim të shpejtë efektivit të plagosur Edison Adri.
Rama kërkoi dënim maksimal për autorin.
“Gjatë një operacioni të guximshëm për kapjen e një të arratisuri të shumëkërkuar, i cili për vite me radhë i ishte shmangur ligjit në malet e Korçës dhe kishte arritur vazhdimisht t’i shpëtonte rrethimit të forcave të rendit, një oficer policie humbi jetën dhe një i dytë u plagos, ndërsa pasi hapi zjarr ndaj tyre, edhe krimineli u plagos dhe u kap! Nderim i përjetshëm për dëshmorin e atdheut, ngushëllime familjes dhe shërim të shpejtë oficerit tjetër. Dënim maksimal për të arratisurin e shumëkërkuar dhe respekt maksimal për Policinë e Shtetit, e cila nuk do të ndalet kurrë në misionin e saj”, shkruan Rama.