Një burrë me origjinë shqiptare është gjetur i vrarë në Totana të Spanjës.
Mediat vendase shkruajnë se viktima është gjetur i vrarë me një plumb në kokë pranë shtratit të tharë të lumit Guadalentín.
Shqiptari rezultonte i zhdukur që prej së hënës. Portali lokal “Republica” shkruan se trupi i viktimës kishte shenja të qarta dhune.
Gazeta rajonale “La Opinión” shkruan se ai kishte marrë një plumb në kokë. Raporti i tyre gjithashtu sqaron se i ndjeri ishte me origjinë shqiptare, zhdukja e të cilit ishte raportuar të hënën në Mazarron.
Portali tjetër spanjoll “La Verdad” shkruan se vrasja ka tipare mafioze, ndoshta për larje hesapesh që kanë të bëjnë me trafikun e drogës.
Nuk dihen ende nëse trupi është vrarë në vendngjarje apo është çuar atje nga vrasësit.
Ishte një banor lokal që lajmëroi Gardën Civile për praninë e një makine në brigjet e lumit që prej së hënës, e cila nuk kishte lëvizur nga vendi.
Pas kontrollit, policia gjeti trupin e pajetë, i cili është transferuar pranë Institutit Anatomik të Mjekësisë Ligjore në Murcia, ku do të kryhet autopsia.