Pak orës pas vrasjes së dy vëllezërve Astrit dhe Brahim Bilali është shkarkuar nga detyra drejtori i Policisë së Shkodrës Vehbi Bushati dhe në vend të tij është emëruar Niko Brahimi. Ndërkohë pasditen e sotme në Shkodër ishte edhe vetë ministri i Brendshëm, Sandër Lleshaj.
Lleshaj u shpreh se për t’i dhënë një impuls të ri qytetit, sipas tij në krye të policisë së Shkodrës, në vend të Vehbi Bushatit do të vendoset Niko Brahimaj.
“Për t’i dhënë qytetit një impuls të ri, kemi vënë në Policinë e Shkodrës Niko Brahimaj në vend të Vehbi Bushatit. Erdha në Shkodër për këtë arsye, por edhe për ngjarjen e rëndë të ndodhur. Vrasja në Shkodër është vrasje për larje hesapesh. Forcat e policisë po bëjnë maksimumin për ta zbardhur ngjarjen. Qytetarët nuk kanë pse të mos ndjehen të sigurt. Ne jemi në proces hetimi për këtë ngjarje, por edhe për ngjarje të tjera. Shpresoj që të kemi sa më shpejt rezultate”, ka thënë ministri.
Vendimi i ministrit vjen pas ngjarjes së ndodhur paraditen e sotme, ku si pasojë e një atentati tmbeten të vrarë dy vëllezërit Astrit dhe Ibrahim Bilali, 59 dhe 61 vjeç.