Giannis Skaftouros, i njohur si bosi i jetës së natës në Athinë, u ekzekutua mesditën e sotme me breshëri kallashnikovi pranë banesës së tij në Skourta të Athinës. Sipas mediave greke, nga ky atentat mbeti e plagosur edhe vajza e tij.
Teksa ndodhej në lëndinën e shtëpisë së tij nën shoqërinë e të afërmve duke festuar pas Pashkëve, persona ende të paidentifikuar u afruan dhe qëlluan me breshëri automatiku në drejtim të 55-vjeçarit, i cili vdiq në vend. Ndërkaq, vajza e tij 22-vjeçare mori një plumb dhe u dërgua e plagosur në spital, ku ndodhet nën kujdesin e mjekëve.
Menjëherë pas atentatit, policia greke ka nisur një operacion të gjerë kërkimi në zonën përreth dhe në Athinë, ku krahas makinave janë futur në funksion edhe helikopterët.
Giannis Skaftouros njihej si bosi i jetës së natës në Greqi. Në vitin 2018, ai u sulmua me thikë nga disa shqiptarë në burgun e Koridalos ku edhe mori plagë të rënda. Dyshohet se ai sulm u planifikua dhe zhvillua nga pjestarët e “Mafias së Burgjeve” të përbërë nga shqiptarë, me qendër Korydalon sipas mediave greke.