Për dhunën në parlamentin e Kosovës, kanë ardhur reagimet zyrtare nga dy forcat politike të përfshira në përleshjen fizike. Lëvizja Vetëvendosje ka publikuar videon ku shihet kryeministri Albin Kurti, i bllokuar në foltore, në shoqërinë e ministrave dhe deputetëve të tjerë.
“I patrembur para krimit të 20 vjetëve!”, shkruhet në fjalinë e përdorur për të pasqyruar materialin filmik.
Partia Demokratike e Kosovës reagoi duke dënuar ashpër, atë që e konsideroi një sulm të zv.kryeministrit Besnik Bislim në drejtim të deputetëve të këtij subjekti. “Tani, gjithçka është e qartë. Kjo Qeveri, ky kryeministër, ky pushtet, shihet qartë se duke tentuar të fshehë koordinimin dhe bashkëpunimin me Millan Radojçiç, po përdorë çdo mjet, edhe dhunën, ndaj deputetëve opozitarë”, shkruhet në njoftimin e PDK.
Partia opozitare kërkoi zgjedhje të reja, ndërsa akuzoi Vetëvendosjen se po fyen shtetin e Kosovës, veteranët e UÇK-së dhe politikanët shqiptarë.