Kryetari i bashkisë në ikje i Kamzës, Xhelal Mziu, ka ngritur një padi në Gjykatën e Tiranës ku kërkon mos njohjen e zgjedhjeve lokale të 30 qershorit në këtë qytet.
Mziu kërkon që mandati i Rakip Sulit të mos njihet nga Gjykata. Ndërkohë seanca për këtë padi do të mbahet në orën 12.00 ku gjyqtare do të jetë Manjola Bejleri.
Sipas padisë dhe Xhelal Mziut ai ka te drejtë të qëndrojë në detyre deri në tetor, duke u bazuar në dekretin e Metës për zgjedhjet lokale që të zhvillohen më 13 tetor. Po kështu në orën 12 në Gjykatë do të shqyrtohet edhe kërkesa e kryetarit të Ri të Kamzës të dalë nga 30 qershori, Rakip Sulit.
Nëse Mziu nuk liron zyrën pas betimit të Sulit, ai rrezikon deri ne 1 vit burg. Kryerja e funksioneve nga kryebashkiakët pas mbarimit të mandatit përbën kundërvajtje penale dhe dënohet me gjobë ose me burgim gjer në një vit. Neni 249 i Kodit Penal parashikon që vazhdimi i ushtrimit të funksionit shtetëror apo të shërbimit publik nga ana e personit që është vënë në dijeni të vendimit apo rrethanës që u ka dhënë fund ushtrimit të tyre, përbën kundërvajtje penale dhe dënohet me gjobë ose me burgim gjer në një vit. Pra, çdo akt i përfaqësuesve të PD-LSI pas betimit të kryebashkiakëve të rinj jo vetëm është nul, por përbën edhe vepër penale.
Kujtojmë se Mziu është një nga disa kryebashkiakët e djathtë që i kanë dalë kundër Bashës.