Këshilltarja e Gjykatës së Lartë, Elona Kana ka pësuar humbjen e parë në ballafaqimin e saj me Komisionin e Pavarur të Kualifikimit.
Një javë më parë, Kana paraqiti një kërkesë për përjashtimin e relatores së çështjes, Xhensila Pine nga gjykimi i dosjes dhe figurës së saj gjatë procesit të vettingut.
Duke e konsideruar relatoren të njëanshme në atë që ajo e quajti “ulje radikale të të ardhurave dhe rritje të pajustifikuar të shpenzimeve”, Kana ngriti dyshime për ndikim politik të relatores në qëndrimin ndaj saj.
“Vlerësoj se relatorja është propozuar dhe zgjedhur nga Partia Demokratike dhe se më cënohet integriteti. Kjo për shkak të qëndrimit të bashkëshortit tim në zgjedhjet e 30 qershorit. Pretendoj se qëndrimi i relatores është haptazi subjektiv,” deklaroi këshilltarja e Gjykatës së Lartë në seancë.
Por burime për tirananews.al bëjnë me dije se tre gjyqtarët e kërkesës së saj Pamela Qirko, Roland Ilia dhe Lulëzim Hamitaj mendojnë se nuk ka asnjë provë se relatorja Xhensila Pine do të paragjykonte dosjen e këshilltares së Gjykatës së Larë, Elona Kana.
Pretendimi i subjektit të rivlerësimit për ndikim politik në qëndrimet e relatores Pine lidhej me funksionin e bashkëshortit të saj, Z.Denar Biba si nënkryetar i Komisionit Qendror të Zgjedhjeve. Kana e mbështeti kërkesën e saj për përjashtimin e Pines edhe me ndjesinë e saj se nuk ishin marrë parasysh provat dhe dokumentet e dorëzuara në lidhje me udhëtimet e punës si dhe të ardhurat e saj.
Subjekti e falënderoi KPK-në për afatin e gjatë që i kishte lënë në dispozicion për të dorëzur provat, por shtoi se konsideronte se qëndrimi i Komisionit duhej të kishte ndryshuar.
“Nuk mund të vazhdojë gjykimi, nëse më parë nuk jam njohur me qëndrimin e KPK-së pas dorëzimit të provave dhe dokumenteve të reja, pasi nuk mund të bëj një mbrojtje efektive,” pretendoi ajo.
Elona Kana ka punuar si këshilltare në Gjykatën e Lartë në vitet 2004-2006 dhe pas një shkëputje 6-vjeçare vazhdon të mbajë të njëjtin pozicion prej vitit 2012. Ajo ndjek njëkohësisht edhe studimet në Shkollën e Magjistraturës. /tirananews.al