Ambasadorja e SHBA-në në Tiranë, Yuri Kim zhvilloi këtë të hënë së bashku me ministren Belinda Balluku një inspektim në termocentralet lundruese për prodhimin e energjisë të vendosura në Vlorë.
Kryediplomatja amerikane u shpreh se këto termocentrale do të sigurojnë energji elektrike për rreth 150 deri në 200 mijë banesa në vit, ndërsa shtoi se SHBA kërkon të sigurohet që vendet aleate të NATO, si Shqipëria, të mos vuajnë nga mungesa e energjisë me të cilën po përballet bota.
“I thashë ministres se nuk duken të bukur por rëndësi ka që funksionojnë. Po ju tregoj dhe statistikat, vitin e kaluar konsumi i Shqipërisë ka qenë 8.4 dhe nëse funksionon siç duhet këto termocentrale do të prodhojnë 114 megavat, kjo të paktën mund të përmbush 12-15% nevojat totale për energji elektrike të vendit. Në terma mesatar do të thotë 150 deri 200 mijë shtëpi që do të sigurojnë energji elektrike nga këto anije”, tha Kim.
Nga ana tjetër, Ballaku shkruan se Shqipëria po punon intensivisht për të rritur kapacitetet prodhuese të energjisë për përballimin e krizës energjetike me të cilën po haset vendi.