Ministria e Mbrojtjes bëri të ditur marrjen e tre helikopterëve Black Hawk nga Shtetet e Bashkuara të Amerikës. Por ka qenë një media polake që ka zbuluar disa detaje të kësaj kontrate, që u firmos në mes të prillit në SHBA nga Ministrja Olta Xhaçka.
Media polake thotë se helikopterët që do të marrin Forcat e Armatosura shqiptare janë pjesë e paketës së ndihmës për Tiranën, një anëtare e NATO që në 2009. Falë blerjes së tyre ushtria shqiptare do të ketë pajisje sipas standardeve të aleancës. Më herët Shqipëria mori dhe “bishat” amerikane, makinat HMMWV dhe MRAP.
Lexo edhe- Ja helikopterët amerikanë që do ketë ushtria shqiptare
Sipas medias polake, Shtetet e Bashkuara marrin përsipër koston e trajnimit të pilotëve dhe shërbimet teknike, ndërsa Shqipëria nga ana e saj do të paguajë një taksë vjetore, shuma e të cilës nuk është bërë ende e ditur.
Trajnimi i ushtarëve shqiptarë do të nisë këtë verë, dhe do të mbahet në bazën e përbashkët të të gjitha llojeve të forcave amerikane, McGuire-Dix- Lakehurst, në Gardën Kombëtare të Nju Xhersi. Së pari, shërbimi teknik i mjeteve do të kryhet atje.