Në fokus të takimit të Zv.Ndihmës Sekretarit Amerikan të Shtetit për Evropën, Gabriel Escobar, me Presidentin e Republikës Bajram Begaj, ishin zhvillimet në rajonin e Ballkanit Perëndimor.
Pasi vlerësoi marrëdhëniet e shkëlqyera e të partneritetit strategjik midis dy vendeve, kreu i shtetit nënvizoi rolin e pazëvendësueshëm të SHBA për garantimin e paqes dhe sigurisë në rajon.
Në mënyrë të veçantë, Presidenti Begaj, vlerësoi mbështetjen që Shtetet e Bashkuara dhe personalisht zoti Escobar, i kanë dhënë procesit të negociatave mes Kosovës dhe Serbisë të ndërmjetësuar nga Bashkimi Evropian.
“Normalizimi i marrëdhënieve mes Kosovës dhe Serbisë, me në qendër njohjen e tyre reciproke, është një proces me ndikim të madh rajonal, si në kuadër të aspekteve të sigurisë ashtu edhe të zhvillimit të qendrueshëm të tij”, nënvizoi Presidenti.