Mediat kanë zbardhur emrin e personit të shpallur në kërkim që mendohet se është pritësi i kokainës së sekuestruar gjatë operacionit “Kuito”.
Bëhet fjalë për Gentian Malindi, 42 vjeç biznesmen dhe djali i një avokati të njohur.
Malindi ka qenë me dy të arrestuarit, Ardian Bega dhe Altin Mislihaka, punonjës të portit të Durrësit, por ka kuptuar që pakot me kokainë kishin GPS dhe i ka shpëtuar policisë Në pranga përfunduan vetëm Bega dhe Mislihaka.
Lexo edhe- “Kuito”, policia jep detajet për kokainën nga Ekuadori. Ja kush ishin pritësit
Dy të arrestuarit i janë afruar kontenierit duke marrë disa pako me kokainë, e duke i çuar në një mjet me targa franceze ku ndodhej Malindi, pronar i një anije peshkimi. Por ka kuptuar se ishin zbuluar nga policia dhe u largua.
Sipas dëshmisë së dhënë nga një prej të arrestuarve, ata kanë hyrë në port nga ana e Urës së Dajlanit dhe kanë mundur të marrin disa nga pakot me drogë. Rruga e tyre ka vijuar drejt Shkëmbit të Kavajës, kur gjatë ecjes kanë kuptuar se diçka nuk shkonte. Ishte pikërisht Gentian Malindi që kuptoi se në pakot e kokainës kishte edhe oriz. Sipas dëshmisë dhënë para oficerëve të Ardian Begës, Malindi u ka kërkuar të mos flasin pasi në automjet mund të kishte çip, raporton shqiptarja.com.
Gentian Malindi ka qenë edhe më herët i arrestuar dhe proceduar për drogë. Në qershor të vitit 2013, Malindi është arrestuar pasi në një furgon mallrash u gjet nga policia 500 kilogramë kanabis, në një operacion të koduar “Sfida”. Lënda narkotike vinte nga Lazarati.
Në vitin 2015, ai ka akuzuar Policinë Kufitare se bënin kontrolle të vazhdueshme në anijen e tij për drogë.
