Lulzim Basha ka nisur të bëjë lëvizjes e para vetëm një javë pasi dha dorëheqjen si kryetar i Partisë Demokratike. Ai ka marrë një zyrë të re, jashtë selisë së Partisë Demokratike. Ai është zhvendosur pranë zyrave të ish-deputetit të PD-së, Endri Hasa, pranë qendrës “Torre Drin” në rrugën “Abdi Toptani”. Ky do të jetë dhe vendi ku Basha do të zhvillojë takimet e tij të radhës dhe po vepron njësoj si ish-kryeministri Sali Berisha.
Kur lideri historik i PD-së, dha dorëheqjen publikisht si kryetar i PD-së, në 26 qershor 2013 u zhvendos në zyrën e tij private, vetëm pak metra larg shtëpisë ku banon, në rrugën “Mustafa Matohiti”.
Në atë kohë, Berisha zgjodhi të kishte një zyrë me divanë, kolltukë dhe karrige të veshura me lëkurë, me punim vintage të stilit klasik e biblioteka druri, ndërsa arredimi i ‘shtëpisë’ së re të Bashës nuk dihet ende.