Mbarë bota po ndjek funeralin e monakres që mbretërori për 70 vite. Funerali i Mbretëreshës Elizabeth II do të mbahet në Westminster Abbey në Londër, ku do të jenë të pranishëm rreth 2000 njerëz.
Një ceremoni luksoze, me vigjilje dhe procesione ushtarake, përkujtime solemne, ekrane gjigante për të transmetuar ngjarjet në prani të krerëve të shteteve, liderëve botërorë dhe familjeve mbretërore nga bota, është siguruar pa asnjë kursim për funeralin e mbretëreshës Elizabeth II.
Për këtë ceremoni luksoze është e vështirë që të bëhet një vlerësim i saktë i kostove, por mediat e huaja bëjnë me dije se bëhet fjalë për miliona paund dhe do të jenë taksapaguesit britanikë ata që do të paguajnë.
Shifrat e sakta nuk dihen, por është e sigurt se do të kalojnë rreth 4 milionët e shpenzuara për lamtumirën e fundit të Zonjës Dianës, por edhe 5 milionët e ndara për funeralin e Nënës Mbretëreshë. Asnjë krahasim me kostot e bëra për ceremoninë e Princit Philip, e cila, për shkak të kufizimeve anticovid, ishte organizuar në një formë më modeste.