Gruaja e parë e ish-Presidentit Donald Trump, Ivana Trump, ka humbur jetën nga plagët e shkaktuara pas rrëzimit nga shkallët, dhe jo nga arresti kardiak, siç u dyshua më herët. Këto janë rezultatet e fundit të autopsisë.
Ivana Trump u gjet e pajetë më 14 korrik në fund të shkallëve të banesës së saj në Upper East Side të New York. Siç raportojnë mediat amerikane, vdekjen e Ivana Trump e konstatuan mjekët ndihmës së shpejtë në Manhattan, të cilët ndërhynë në përgjigje të thirrjes së urgjencës për një arrest kardiak të dyshuar.
Nuk dihet ende nëse rënia ka qenë aksidentale apo e shkaktuar nga një sëmundje. Megjithatë, ajo që hetuesit përjashtuan që në fillim si pistë, është vrasja. Siç shpjegohet nga “New York Times”, vdekja ishte aksidentale dhe nuk kishte shenja të hyrjes me forcë në shtëpi.