Sekretari i Mbrojtjes i Mbretërisë së Bashkuar, Ben Wallace tha se ai nuk pajtohet me vendimin e Princ Harryt, për të zbuluar se sa luftëtarë talebanë vrau ndërsa shërbente në Ushtrinë Britanike në Afganistan, duke thënë se “mburrja për shifrat” është gjëja më e gabuar që mund të bëhet.
Princi Harry u përball me kritika muajin e kaluar nga disa figura britanike të sigurisë dhe ushtarake, si dhe nga vetë talebanët, pasi ai pretendoi në autobiografinë e tij “Spare” se kishte vrarë 25 nga luftëtarët e grupit kryengritës.
“Pra, numri im: njëzet e pesë. Nuk ishte një numër që më jepte ndonjë kënaqësi. Por as nuk ishte një numër që më bëri të ndihesha i turpëruar”, ka shkruar Harry.
Wallace i tha radios britanike LBC të enjten se “çdo veteran bën zgjedhjet e veta për atë që dëshiron të flasë”, por forcat e armatosura nuk kanë të bëjnë me një numërim të personave që kanë vrarë.
Vetë një ish-ushtar, Wallace tha se mburrja për shifrat, shtrembëron faktin që ushtria është një lojë ekipore, me këmbësorinë e mbështetur nga qindra njerëz, si ata në Korpusin Logjistik Mbretëror dhe në selinë .
“Nuk ka të bëjë me atë se kush mund të qëllojë më shumë ose kush nuk qëllon më shumë”, shtoi Wallace. “Është pikëpamja ime personale që nëse filloni të flisni se kush bëri çfarë, ju në fakt po i zhgënjeni të gjithë ata njerëz të tjerë sepse nuk jeni një person më i mirë për atë që keni bërë.”