Presidenti Volodymyr Zelenksy ka deklaruar se më shumë se gjysmë milioni ukrainas janë dërguar me forcë në Rusi që nga fillimi i luftës. Gjatë një fjalimi në parlamentin e Islandës Zelensky tha se ukrainasve iu janë konfiskuar dokumentet dhe mjetet e tjera të identifikimit. Ndërsa shton se ata dërgohen në distanca të mëdha për t’u asimiluar.
“Ata u detyruan të shkonin atje. Atyre u konfiskohen dokumentet dhe mjetet identifikimit e komunikimit. Ata dërgohen në rajone të largëta të asaj toke të huaj për t’u asimiluar”, u shpreh ai.
Në fjalimin e tij në parlamentin islandez, Zelensky nënvizoi lidhjet shekullore midis dy vendeve dhe falënderoi Islandën për pjesëmarrjen në sanksionet kundër Rusisë.
Fjalimi i tij shënoi herën e parë që një kryetar shteti i huaj mbajti një fjalim në Alþingi, në parlamentin e Islandës.
Ministri i Jashtëm i Islandës, Thórdís Gylfadóttir, tha se vendi “është i gatshëm të bëjë gjithçka” brenda fuqisë së tij për të ndihmuar Ukrainën.