Kryetari i Partisë Demokristiane Nard Ndoka ka treguar vendimin e opozitës për qeverinë teknike.
Gjatë një interviste në “KafeIN”, ai ka deklaruar se opozita e voton Kastriot Islamin si kryeministër në rast se PS djeg mandatet e saj dhe themelon qeverinë tranzitore për përgatitjen e zgjedhjeve.
Ndoka tha se në PS ka emra si Majko e Meta që janë dorëhequr në raste krizash, ndaj Rama duhet të reflektojë.
“Unë ndryshe nga të tjerët kam një dozë besimi te Rama e mendoj se ai do të reflektojë. Po investohet tek ndërkombëtarët, po bën lëvizjet e tij por në fund do të ulet”, tha Ndoka.
Kreu i Demokristianëve ka deklaruar se protestat e opozitës do të vazhdojnë dhe numri i qytetarëve pjesëmarrës sa vjen dhe po shtohet.
“Protesta e 11 majit më dha një adrenalinë të pashpjeguar. Për shkak të shiut dola me përtesë nga shtëpia derisa pashë masën e madhe të njerëzve në shesh”, u shpreh zoti Ndoka.