Këtë të dielë, kreu i PD-së Sali Berisha në një konferencë me një parti nga Suedia për zgjedhjet lokale 2023, tha se kandidatët e opozitës do të publikohen brenda tetorit.
“Përpjekje të mëdha do të bëhen që të mbyllen gjatë muajit tetor të gjithë emrat për kryebashkiakë. Sidomos kjo për Bashkitë e mëdha duhet ti mbarojmë brenda muajit tetor. Do të jetë një garë e hapur, listat e simpatizantëve kanë shumë rëndësi, ato nuk bëhen nga kryesitë por nga seksionet e PD-së. Çdo kryetar seksioni do të rregjistrojë simpatizantin, ne duhet të bëjmë çdo gjë që simpatizantët të votojnë. Ia premtuam atyre gjatë gjithë vitit dhe duhet ta zbatojmë”,-tha Berisha.
Krah Gerti Bogdanit, i cili ka shprehur ambicien për të qenë kandidat i Bashkisë së Tiranës, Sali Berisha nuk e konfirmoi si emër, por e ftoi ashtu si gjithë demokratët të marrë pjesë në primare.
“Nuk ka shumë procedura burokratike. Ne mirëpresim vetë kandidimet, mirëpresim propozimet. Do jetë garë e hapur. Do bëhen listat e simpatizantëve. Kanë shumë rëndësi. Nuk bëhen nga kryesitë, as nga drejtimi qendror, por nga seksionet e PD-së. Çdo seksion do regjistrojë simpatizantin, atë që bashkëpunon gjatë fushatës”.
Po ashtu Sali Berisha kërkoi angazhimin e strukturave për të bërë për vete elektoratin gri, ndërsa fushata elektorale sipas tij duhet të shtrihet jo vetëm derë më derë, por edhe në rrjetet sociale.