Deputeti socialist Besian Ajazi, nuk e përjashtoi kandidimin për kryetar në Bashkinë e Gramshit, zonë në të cilën, është aktualisht përfaqësues i parlamentit.
Pyetjes së moderatores në emisionin ‘Quo Vadis’ në lidhje me marrjen e një angazhimi të tillë, Ajazi nuk e mohoi por shtoi se fillimisht duhet të shprehet në lidhje me këtë gjë kryesia e PS.
“Ky është një vendim që i takon kryesisë së Partisë Socialiste. Nëse kryesia vendos që unë të jem kandidat për Bashkinë e Gramshit do ta marr në konsideratë dhe për mua marrja e një përgjegjësie të tillë do të ishte nder, pse jo?”– tha deputeti socialist Besian Ajazi.
Ajazi ishte një nga prurjet e reja të Partisë Socialiste në Kuvendin e Shqipërisë në zgjedhjet e 25 prillit të vitit 2021. Ai grumbulloi një numër të konsiderueshëm votash në siglën e PS në qarkun e Elbasanit veçanërisht për Bashkinë e Gramshit, zonë të cilën përfaqëson.
Ajazi, me profesion në të kaluarën gazetar, ka një lidhje të ngushtë me Gramshin pasi është origjina e tij ndërsa babai i tij ka drejtuar më herët Bashkinë e këtij qyteti.