Kreu i KQZ-së Ilirjan Celibashi tha se ka nisur ndarja e fletëve të votimit për qarqet Vlorë, Korçë, Berat, Gjirokastër, Elbasan dhe Fier.
Ndërsa këtë të martë mbërrijnë dhe fletët e votimit për qarqet Tiranë, Durrës, Kukës, Dibër, Lezhë dhe Shkodër.
Në një komunikim me gazetarët ai tha se materialet mbërrijnë dy ditë para pritshmërive çka do i ndihmojë në organizimin më mirë të punës për ndarjen në qendrat e votimit.
“Kemi siguruar, sikurse e kemi bërë dhe publike, kamerat e vëzhgimit për 5199 qendra votimi, janë shpërndarë në të gjitha KZAZ dhe në ditët në vijim në çdo qendër votimi”, tha ai.
Ai tha se do të ketë sanksione të ashpra për shkeljet nga komisionerët, ndërsa vijoi se nuk do të ketë probleme për nxjerrjen e rezultatit.