Lëvizja Vetëvendosje ka propozuar Albin Kurtin si kandidat për kryeministër në zgjedhjet e parakohshme të 7 qershorit.
Në mbledhjen e Këshillit të Partisë, Kurti mori mbështetjen e delegatëve e nga aty, kërkoi 60% të votave të qytetarëve të Kosovës.
“Prej shkurtit deri në dhjetor vitin e kaluar u rritëm për 9%, nëse rritemi po aq prej dhjetorit deri në qershor mund të prekim 60%. Nëse punojmë veçse ne dimë, me sinqeritet dhe përkushtim edhe kjo padyshim është e mundur”, tha Kurti.
Kryetari i Vetëvendosjes zgjodhi që edhe njëherë të fajësojë partitë opozitare për bllokadën dhe zgjedhjet e jashtëzakonshme që vijnë për shkak të mungesës së konsensusit për zgjedhjen e presidentit të ri.
Sa i përket kësaj çështjeje, Albin Kurti deklaroi se pas zgjedhjeve do bashkëpunojnë me partitë për të zgjedhur një president jopartiak.
“Pas zgjedhjeve sërish do të kërkojmë bashkëpunim për një president jopartiak, jashtë skenës aktuale politike, me integritet e kompetencë”, deklaroi kryeministri në detyrë.