Kandidati i Bindjes Demokratike për Bashkinë e Skraparit është tërhequr nga gara pasi është kërcënuar.
Në njoftimin e bërë nga vetë Partia Bindja Demokratike, thuhet se kandidati i tyre Devi Hebibasi u tërhoq nga gara, pas presioneve të forta në adresë të tij nga njerëzit e qeverisë.
Një ditë më parë ai ishte paraqitur në selinë e Bindjes Demokratike në Tiranë shumë entuziast për një rezultat surprizë në Corovodë, pas takimeve të para që kishte pasur me banorët atje.
‘Ne kemi dyshime të forta se prapa kësaj historie qëndron kandidati rival i Partisë Socialiste, së bashku me deputetin e zonës, Adnor Shametin, të cilët mesa duket janë ndjerë të frikësuar për rezultatin. Me gjithe ftesat e përsëritura dhe lutjeve tona per ta rikonsideruar vendimin, kandiati ynë në Skrapar nuk pranoi të rihynte në garë’, thuhet ndër të tjera në njoftimin e Bindjes.
Gjithashtu, Bindja Demokratike i kërkon organeve kompetente një hetim të shpejtë për ngjarjen dhe i bën thirrje faktorit ndërkombëtar që të monitorojë rreptësisht procesin.