Deputeti i Partisë Demokratike, Flamur Noka deklaroi se proçesi zgjedhor për kreun e FRPD-së ishte i shkëlqyer dhe se kandidatët nuk kanë kontestuar rezultatin.
Në emisionin “Now”, Noka u shpreh se për herë të parë në politikën shqiptare, një forum organizon dhe zhvillon vetë zgjedhjet, pa ndërhyrje partiake.
“Nuk ka asnjë dyshim për garën në forum. Çfarë ishte gara për forumin? Për herë të parë në Shqipëri, të rinjtë e një forumi rinor, organizojnë, drejtojnë dhe menaxhojnë vetë pa asnjë ndërhyrje partiake, një proçes të shkëlqyer elektoral. Për herë të parë, ke parë që partia nuk ka caktuar, janë propozuar 6 kandidatë.
I janë nënshtruar një proçesi dhe kanë bërë debat publik. Është zhvilluar një proçes, asnjë kontestim zyrtar nga askush nuk ka. Unë i kuptoj, janë të rinj, kanë emocione, ka edhe artikulime në ajër. Prova, fakte, ankesa nuk ka. Kandidatët deri më tani, nuk kanë pasur kontestim”, theksoi Noka.
Besart Xhaferri u zgjodh në krye të Forumit Rinor të Partisë Demokratike, pasi arriti të sigurojë 55.5% të votave, në zgjedhjet që u zhvilluan më 1 tetor.