Ministri Bledi Çuçi ishte këtë të mërkurë në Berat, dhe si drejtues politik i Partisë Socialiste në këtë qark, dëgjoi nga afër platformat e kandidatëve për kryetar të PS-së.
Ai ishte bashkë me deputetët Blendi Klosi, Anila Denaj dhe Etjen Xhafaj, të cilët janë pjesë e Komisionit të Posaçëm të ngritur nga Kryesia e PS për këtë proces.
“Interesimi i madh i atyre që kanë aplikuar tregon për vërtetësinë dhe seriozitetin e këtij procesi që ne e kemi ndërmarrë si parti duke qenë sërish një shembull i mirë për jetën politike në Shqipëri…Ballafaqimi i çdo kandidati me anëtarësinë është një moment shumë i rëndësishëm, ku të gjithë duhet të gjykojnë mbi performancën e secilit nga kandidatët”, u shpreh ministri Çuçi.
Procesi i zgjedhjes së drejtuesve të rinj të PS-së në të gjithë vendin mbyllet brenda muajit qershor.