Lëvizja Bashkë do të ketë kandidatin e saj në zgjedhjet e parakohshme për Bashkinë e Tiranës, nëse shkarkohet Erion Veliaj.
Deputeti i kësaj partie Redi Muçi, sipas të cilit kryeqyteti është bastioni i Lëvizjes Bashkë, ku kanë mbështetjen më të madhe qytetare, tha se kjo forcë politike nuk do të ketë kandidat të përbashkët me PD-në.
“Ne në Tiranë kemi mbështetjen tonë kryesore. Për hir të së vërtetës PS krahasimisht me 4 vite më parë pësoi humbje dhe një pjesë e mirë e qytetarëve të Tiranës që dikur kanë votuar PS-në e kanë kthyer votën te Lëvizja Bashkë. Tirana është bastioni ynë kemi mbështetje të madhe dhe gjithmonë për qytetarët e Tiranës do kemi një alternativë, pavarësisht faktit që fushatat kanë kosto financiare dhe të energjive që shpenzojmë. Megjithatë ne jemi të gatshëm të hidhemi në fushatën e radhës kurdo që mbahen zgjedhjet në Tiranë. Do kemi kandidatin tonë”, pohoi Muçi.
Ai hodhi poshtë idenë për një kandidat të përbashkët të opozitës në këto zgjedhje, dhe theksoi se partia e tij nuk do të vendoset kurrë në funksion të një kandidati të Partisë Demokratike.
“Qëndrimi ynë është ai që kemi patur edhe në zgjedhjet e 11 majit që nuk bashkëpunojmë me opozitën. Nuk bëhemi vegël e patericë që një figurë e PD të zëvendësojë një figurë të PS se kjo nuk ka sjellë asnjë të mirë ndaj vendit tonë. Duke qenë parti e së majtës demokratike, ne synojmë të bindim një pjesë të madhe të elektoratit të zhgënjyer me PS dhe pse jo me PD. Por ama që t’i kërkojmë qytetarëve vota që të zgjedhim një kandidat të PD-së, kjo nuk ka për të ndodhur kurrë”, theksoi deputeti.