Kreu i shtetit Ilir Meta është shprehur në konferencën për median se ka pasur mjaft zhvillime pozitive për sa i përket reformës zgjedhore, teksa opozita sipas tij ka hequr dorë nga kushti për qeverinë tranzitore dhe kjo e bën më të mundur konsesusin.
“E kam theksuar se data 8 qershor është shumë e rëndësishme dhe shpresoj të arrihet patjetër në mënyrë që Komisioni Europian të shënojë një lajm pozitiv në drejtim të vendeve anëtare. Duket që ka një progres nga të gjitha raportimet që janë bërë dhe duket që çështja ka mbetur për mirëbesimin në disa aspekte, apo elementë që nuk duhet kurrsesi të rrezikojnë konsensusin. Në dijeninë time, di që opozita nuk ka vendosur si kusht një qeveri tranzitore, unë mendoj që mospasja e një kushti të tillë e bën konsensusin tërësisht të mundur dhe shpresoj që sa më shpejt të kemi një lajm pozitiv. Sigurisht që uroj shumë që kjo gjë të ndodhë dhe inkurajoj sa më shpejt, nuk do të thotë se provimi i zgjedhjeve kanë kaluar, pasi kushtet kanë të bëjnë dhe me zbatimin e kësaj reforme, pra me vetë verifikimin se si do të bëhen zgjedhjet e ardhshme në Shqipëri. Shpresoj të reflektohet sa më shpejt në këtë drejtim”, tha Meta.