Astrit Dobrushi është zgjedhur këtë të mërkurë, kryetar i Këshillit të Qarkut Kukës. Votimi ka qenë një formalitet pasi nuk kishte kandidat tjetër. Dobrushi u zgjodh në këtë detyrë me 9 vota pro dhe një kundër. Në zgjedhjet e 14 majit, ai u zgjodh anëtar i Këshillit Bashkiak të Kukësit i propozuar nga Partia Agrare Ambientaliste.
Në fjalën e tij, si kryetar i sapozgjedhur i Qarkut, Dobrushi, tha se do të bëjmë punë të mira në shërbim të komunitetit tonë. Nënkryetar është zgjedhur përfaqësuesja e Bashkisë Tropojë, Sonila Nezaj. Kryetari i ri i qarkut Astrit Dobrushi, do të zëvendësojë kryetarin e mëparshëm Abdulla Domi.
Konstituimi i Këshillit të Qarkut të Kukësit është bërë në praninë e Prefektit të qarkut, Granit Gjana, drejtuesit politik i PS për qarkun Kukës, Pandeli Majko dhe kryetarit të Bashkisë Kukës, që fitoi më 24 shtator Albert Halilaj. Po në këtë prezencë është zhvilluar edhe mbledhja e parë e këtij këshilli.